سلاطة الثالوث

 المقادير: رأس بسباس صغير- 1 طماطم متوسطة – فلفل أخضر- كعبة زيتون – كعبة فجل – ملعقة صغيرة زيت – قارص- نعناع مرحي – كليل مرحي – بسباس مرحي

 التحضير: بعد غسل الخضر جيدا تتقص في شكل دائرة ثم تتصفف في شكل زهرة الثالوث

 قص الفجل في شكل نوارة تتحط في الوسط و الزيتون شرايح فوق الطماطم.

 يتخدم الزيت و الفاح و القارص ويتحت فوق السلاطة وقت باش ناكلوها

 يمكن تعويض الخضر النية بخضر طايبة مثل

قنارية و سفنارية وبيتراف يتقصو دائرات

 و نعوض الفجل بطماطم في شكل نوارة


سلاطة قوس قزح

 نختاروا 7 خضر الوانها مختلفة (طماطم مقصوصة مربعات صغار – سفنارية مرحية – قطانية أو فلفل أصفر – كرنب أخضر مرحي ني – كرنب أحمر مرحي ني – قنارية مقصوصة كيف الهلال- بيتراف مقصوص مربعات صغار)  ونرصفوها في شكل قوس قزح من الطماطم الى البيتراف ونجمو نفصلوهم بسيور فلفل مشوي

 نحضرو خليط بالزيت و القارص وحبق مرحي و بسباس مرحي يتحط فوق السلاطة كيف باش ناكلوها


بروشات الخضرة

الخضرة الموجودة تتقص مكعبات كبار (طماطم – فلفل – باثنجال – قرع أخضر). نحضر خليط فيه زيت وقارص ونعناع مرحي وثوم مرحي يتخلط فيه الخضرة و تتحط في سفافد لوح او حديد، نشويهم في الفرن

كيف يطيبو ناخذ و رقة ليتو و نفرش فيها سفنارية مرحية عليها عصرة برتقال و مقصوص فيها كعبتين زبيب ونحطو فوقها سافود الخضرة و نرشو فوقو شوية جلجلان و سينوج


سلاطة محابس

نسمطو كعبة عضم و كعبة بيتراف و كعبة قنارية و نصف كعبة قرع اخضر و نصف كعبة سفنارية و النجم و يكون افضل القرع و السفنارية نطيبوهم على الكسكاس.

بعد ما يطيبو ناخذ صحن كبير تحط فيه ورق ليتو و فوق كل ورقة نحط كعبة خضرة اللي طيبتها بعد ما نقعورهب و نفرغها

نقشر العضمة نقصها على ثنين نفرغ الاصفر و نحط الانصاف متاع العضمة فوق ورقتين ليتو

نرحي اصفر العضمة، شطر نخلطو مع الدخلاني متاع البيتراف و شطر مع دخلاني السفنارية نفوح بالحبق و شوية كمون و زيت و قارص أو خل

و نعبي الخليط في الخضرة اللي فرغناها بالتناوب نصف عضمة بالاحمر و نصف بالبرتقالي كعبة القنارية والمحابس الباقية. نزينو كل محبس بورقة نعناع فرشك او ورقة عطرشية أو ورقة معدنوس.

ينجم الحشو يكون متكون من جبن أبيض (ريقوتا) في عوض العضم وبيتراف أو سفنارية مرحية لللي ما يحبش العضم.


سلاطة الجنينة

كرنب أخضر مرحي ني - كرنب أحمر مرحي ني– سفنارية مرحية نية – بروكلو طايب على الكسكاس - كعبة طماطم نية- 4 اوراق ليتو

نحطو اوراق الليتو في صحن و فوق كل ورقة نحطو  الخضرة المرحية مخلطة ثلاثة الوان ونقسم البروكلو مشامم صغار و نرشقهم فوق الخضرة المرحية و في وسط المشامم انحط دائرة الطماطم و فوقها زيتونة مقسومة على اربعة في شكل نوارة صغيرة و اللي يحب انجم يسمط عضمة و بيشرها برحاية الجبن باش تعطي منظر زهرة الميموزا

نحضرو خليط الزيت و قارص او خل و كليل و زعتر باش نصبوه على السلاطة كيف نحطوها في صحنا باش ناكلوها

Références:

Pictures Designed by Freepik.